อวิคต-สหชาต-นิสฺสย-วิปาก-อตฺถีติ เอกํฯ อวิคต-สหชาต-อญฺญมญฺญนิสฺสย-วิปาก-อตฺถีติ เอกํฯ อวิคต-สหชาต-อญฺญมญฺญ-นิสฺสย-วิปาก-สมฺปยุตฺต-อตฺถีติ เอกํฯ อวิคต-สหชาต-นิสฺสย-วิปาก-วิปฺปยุตฺต-อตฺถีติ เอกํฯ อวิคต-สหชาตอญฺญมญฺญ-นิสฺสย-วิปาก-วิปฺปยุตฺต-อตฺถีติ เอกํฯ (สวิปากํ – 5)

อวิคตมูลกํฯ

ปญฺหาวารสฺส อนุโลมคณนาฯ

(2) ปจฺจนียุทฺธาโร

[527] กุสโล ธมฺโม กุสลสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโยฯ

กุสโล ธมฺโม อกุสลสฺส ธมฺมสฺส อารมฺมณปจฺจเยน ปจฺจโย… อุปนิสฺสยปจฺจเยน ปจฺจโยฯ

กุสโล ธมฺโม อพฺยากตสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย… ปจฺฉาชาตปจฺจเยน ปจฺจโย… กมฺมปจฺจเยน ปจฺจโยฯ

กุสโล ธมฺโม กุสลสฺส จ อพฺยากตสฺส จ ธมฺมสฺส สหชาตปจฺจเยน ปจฺจโยฯ (4)

[528] อกุสโล ธมฺโม อกุสลสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโยฯ

อกุสโล ธมฺโม กุสลสฺส ธมฺมสฺส อารมฺมณปจฺจเยน ปจฺจโย… อุปนิสฺสยปจฺจเยน ปจฺจโยฯ

อกุสโล ธมฺโม อพฺยากตสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย… ปจฺฉาชาตปจฺจเยน ปจฺจโย… กมฺมปจฺจเยน ปจฺจโยฯ

อกุสโล ธมฺโม อกุสลสฺส จ อพฺยากตสฺส จ ธมฺมสฺส สหชาตปจฺจเยน ปจฺจโยฯ (4)